Kimyəvi birləşmələr

3

Tibdə həmçinin naşatır spirtindən də geniş istifadə olunur. Naşatır spirtinin formulu NH4OH-dır. Onun parçalanmasından ammonyak əmələ gəlir ki, o da kəskin iyli qazdır. Naşatır spirtindən bayılmış insanları ayıltmaq üçün istifadə olunması da ayrılan ammonyakın kəskin iyi hesabınadır.

Ağız boşluğunda olan bakteriyaları öldürmək üçün antiseptik maddə kimi hidrogen peroksidin suda məhlulundan istifadə olunur. Onun formulu H2O2-dir. Hidrogen peroksid bakteriyaları öldürməklə bərabər, diş əti qanamasının qarşısını almaq və boğaz ağrısını sakitləşdirmək üçün də istifadə edilir.
Bilirsinizmi?
Dərman preparatlarının tərkibi müxtəlif kimyəvi birləşmələrdir. Bunlara aspirini, ibuprofeni, parasetamolu və s. misal göstərmək olar. Bu kimyəvi birləşmələr insan orqanizmində pozulmuş müxtəlif prosesləri tənzimləyir. Məsələn, aspirin qanı duruldur, qan dövranını yaxşılaşdıraraq infarkt riskini azaldır.
Öyrəndiklərinizi tətbiq edin
Kimyəvi birləşməni təşkil edən elementlər onun “keyfiyyət tərkibi”dir.
a. Tanış olduğunuz maddələrdən “keyfiyyət tərkibi” eyni olanları müəyyən edin. Fikrinizi əsaslandırın.
b. Su ilə keyfiyyət tərkibi eyni olan hansı maddəni tanıyırsınız? Bu maddə tibdə hansı məqsədlər üçün istifadə olunur?
Öyrəndiklərinizi yoxlayın
1. Çay sodası və etil spirti, əsasən, hansı məqsədlər üçün istifadə olunur?
2. Uyğunluğu müəyyən edin
Kimyəvi birləşmə
1. Şəkər
2. Aseton
3. Naşatır spirti
Formulu

a. CH3COOH

b. NH4OH

c. C12H22O11

d. H2O2

e. C3H6O