c
Dinozavrlar haqqında nə bilirsiniz? Bəs daha nə öyrənmək istəyərdiniz?
Mətni oxuyun və yeni öyrəndiklərinizi qeyd edin.

Dinozavrlar

1. Müasir dövrdə dinozavrlar uşaqların sevimli film qəhrəmanlarından biridir. Bu heyvanlar cizgi filmlərində xeyirxah, sevimli qəhrəman kimi təsvir edilir. Balacalar onları nəvazişlə "Dino" adlandırırlar. Lakin milyon illər əvvələ qayıtsaq, yəqin ki, heç kim bu qorxunc canlı ilə üz-üzə gəlmək istəməzdi.

2. Təxminən 225 milyon il əvvəl yaşamış dinozavrlar planetimizdə ən böyük canlılar idi. Həmin dövrdə insanlar hələ mövcud deyildilər. Dinozavrlar yarananda planetdə yalnız 1

qitə var idi. Qlobusda gördüyümüz müxtəlif qitələr bir böyük quru ərazinin hissələri idi. Məsələn, dinozavr istəsəydi, indi yaşadığınız yerdən Avstraliyaya qədər piyada gedə bilərdi.

Üstəlik, iqlim çox fərqli idi. Dinozavrların yaşadığı dövrdə Yerdə hava isti və quru idi. Hətta Antarktida kimi indi qarla örtülmüş yerlərdə belə isti idi.
3. Siz, yəqin ki, bütün dinozavrları nəhəng hesab edirsiniz. Əslində isə ilk dinozavrlar kiçik olmuşdur. Məsələn, saltop adlanan dinozavrın gövdəsi 60 sm uzunluğunda idi. Saltop
yırtıcı idi. Çox cəld qaçırdı. Buna görə də kərtənkələləri, həşəratları asanlıqla ovlayırdı.

Ən nəhəng dinozavrlar isə bitkiyeyən zauropodlardır. Zauropodların bir neçə növü məlum olsa da, hamısının bədən quruluşu oxşar idi: nəhəng gövdə, uzun boyun, quyruq və balaca baş. Onların bəzilərinin boyu dördmərtəbəli ev hündürlüyündə idi.