Osmanlı dövlətində Avropa təcrübəsinin öyrənilməsi nəticəsində 1727-ci ildə ilk mətbəə yaradıldı. Mətbəənin dəzgah və qəlibləri xaricdən gətirilmişdi. Burada ilk çap edilmiş kitab ərəbcətürkcə lüğət olmuşdur. Min ədəd çap olunmuş bu kitabın əl İlə yazılmış nüsxəsi 350 quruş (xırda pul vahidi) olduğu halda, mətbəədə çap olunan nüsxənin qiyməti cəmi 35 quruş idi.

Avropa dövlətləri İlə əlaqələrin yaradılması Hindistan mədəniyyətinə təsirsiz ötüşmədi. 1784-cü ildə Uilyam Cons "Benqal-Asiya cəmiyyəti" təşkil etdi. Sonralar bu cəmiyyət "Kral cəmiyyəti" adlandırıldı. Qərbin Hindistanın zəngin qədim mədəniyyəti ilə tanış olmasında həmin cəmiyyət müsbət rol oynamışdı.

Bu dövrdə Çində ensiklopediya və lüğətlər tərtib edilmişdi. Ölkədə Çin dili ilə yanaşı, rəsmi dövlət dili olan mancur dilində də əsərlər yazılırdı.

Qafqazda tibb elminin inkişafında böyük nailiyyətlər əldə olunmuşdu. Təbiblər müxtəlif xəstəlikləri müalicə edir, çiçək xəstəliyinə qarşı peyvənd etməyi bacarırdılar. Avropalı alimlər bu xəstəliyə qarşı peyvənd üsulunu çox son ralar öyrənmişdilər.

Kartli çarı VI Vaxtanqın təşəbbüsü ilə Gürcüstanda mətbəənin əsası qoyulmuşdu. Bu mətbəədə böyük gürcü şairi Şota Rustavelinin "Pələng dərisi geymiş pəhləvan" əsəri daşbasma üsulu ilə çap olunmuşdu.

Ədəbiyyat. XVII—XVIII yüzilliklərdə Azərbaycanda Arif Təbrizli, Xəstə Qasım, Molla Vəli Vidadi və bir çox başqa şairlər yaşayıb-yaratmışdılar. Dövrün ən məşhur şairi isə Molla Pənah Vaqif olmuşdur.