2.6 İNTERAKTİV KOMPÜTER MODELLƏRİ
Kommunal və mobil telefon xidmət haqlarını ödəmək üçün xüsusi terminallardan istifadə edilir.
FƏALİYYƏT
Bildiyiniz kimi, kompüter interaktiv qurğudur, yəni iki istiqamətdə iş rejiminə malik qurğudur: istifadəçi kompüterə sual və ya komanda verdikdə sistem dərhal cavablandırır. Ona görə də kompüter modellərinin əksəriyyəti interaktiv modellər olur. Belə modellərdə tədqiqatçı (istifadəçi) prosesin ilkin şərtlərini və gedişinin parametrlərini dəyişə və modelin fəaliyyətindəki dəyişiklikləri müşahidə edə bilər.
İnteraktiv kompüter modellərinə kompüter oyunlarını, öyrədici proqramları, kompüterdə elmi tədqiqatlar aparmaq və nəticələri yoxlamaq üçün hazırlanmış modelləri aid etmək olar.
www.edu.az təhsil portalında şagirdlər və müəllimər üçün fənlər üzrə çoxlu sayda interaktiv modellər yerləşdirilmişdir. Bu tip modelləri yaratmaq üçün xüsusi proqramlaşdırma alətlərindən istifadə olunur.