Xəmir gəldikdə mayaların fəaliyyəti nəticəsində spirt, süd turşusu və karbon qazı əmələ gəlir. Karbon qazı xəmirin həcminin artmasına səbəb olur. 1,5-2 saatdan sonra xəmiri yenidən 2-3 dəqiqə yoğurub 50-60 dəqiqə qıcqırdırlar. Xəmirin ikinci dəfə yoğrulması nəticəsində əmələ gəlmiş karbon qazı ayrılır. Xəmirin həcmi azalmağa başladıqda onun qıcqırması qurtarmış hesab edilir. Xəmir 1-2 dəqiqə yoğrulur və un səpilmiş taxtanın üstünə qoyulur (Şəkil 1.38). |
|
Bundan sonra xəmir kündələnir, formalanır və 40-50 dəqiqə kündəyə gəlmək üçün qoyulduqdan sonra bişirilir (Şəkil 1.39). |
|
Əgər xəmirdən piroq hazırlanacaqsa, xəmir kündələndikdən sonra 3-5 dəqiqə saxlanılır və yayılır (Şəkil 1.40). Xəmiri yaymaq üçün dairəvi formada taxta, xəmir kündəsini yığmaq və tort qoymaq üçün 2 ədəd kiçik taxta (biri dairəvi olmalıdır) və 3 ədəd oxlov lazımdır (Şəkil 1.38). Bunlardan birincisi, iki tərəfdən ovucla tutulan qalın oxlov, ikincisi, bir tərəfdən tutulan nisbətən qalın oxlov, üçüncüsü isə nazik yuxayayan oxlov olmalıdır. Xəmiri stolun üstündə də yaymaq olar. Bütün bu taxta avadanlıqları uzun müddət isti su ilə yumaq olmaz. Taxta və oxlov ərsinlə təmizlənib yaş dəsmalla silinməli və qurudulmalıdır. Yayılmış xəmir fiqurlu kəsən alətlə formaya salınır (Şəkil 1.41). |