Cəfəri və kərəviz saxlanılma xüsusiyyətinə görə yerkökünə oxşayırlar. Çuğundur isə anbarlarda 1,5-2 m hündürlüyündə yığılmaqla saxlanılır. İxtisalaşdırılmış saxlayıcılarda çuğunduru saxlamaq üçün ilk öncə temperatur 0°C-də nizamlanır. Sonra temperatur tədricən 2-3°C-yə qaldırılır (Şəkil 6.9).
Kələmi saxlamaq üçün anbarları 1-2, bəzən isə 3-4 mərtəbə tərəcələrlə (rəflərlə) təmin edirlər. Kələm soyuğa davamlı bitkidir. Onu 2°C-də saxlamaq olar. -1°C temperatur və 90-95% nisbi rütubət optimal şərait hesab edilir. Yaz-yay aylarında ağbaş kələmi süni soyutma ilə xüsusi anbarlarda saxlamaq lazımdır.
Yarpaqlı tərəvəz bitkilərini 0°C temperaturda və 95-97% nisbi rütubətdə soyuducularda və buzxanalarda saxlamaq daha əlverişlidir. Çünki belə halda onlar soluxmadan 1-2 həftə qala bilirlər.
Yarpaqlı tərəvəzin uzun müddət saxlanması mümkün olmadığına görə, onlar emal (əsasən ev şəraitində) olunmuş şəkildə saxlanılır. Belə ki, yarpaqlı tərəvəz bitkiləri qurudulmuş, marinadlaşdırılmış və dondurulmuş şəkildə saxlamaq mümkündür (Şəkil 6.10).
Səbzə tərəvəz bitkilərini donduraraq saxlamaq üçün ilk öncə tərəvəz yuyulur, suyu çəkildikdən sonra dorğanaraq, soyuducunun buz qabının kiçik hissələrinə doldurulur. Sonra üzərinə qaynanmış su tökülür və soyuduqdan sonra dondurucuya qoyulur. Qışda donmuş tərəvəz kubları çıxarılaraq yeməklərdə istifadə edilir (Şəkil 6.11). Onu da qeyd edək ki, donma müddəti məhsulun keyfiyyətinə bir başa təsir göstərir. Belə ki, tədricən dondurulmaya nisbətən, tez dondurulmuş məhsullarda vitaminlər qalır. Tərəvəzlərin tez dondurulması -30, -40°C-də 2 saat müddətində aparılır. Bu zaman məhsulun daхilində temperatur -18°C olmalıdır.