Yarımkürələrin fiziki xəritəsi tədris prosesində ən geniş istifadə edilən əyani vasitələrdən biridir. Dünyanın bir çərçivədə verilən fiziki xəritəsindən fərqli olaraq, burada yer səthi Şərq və Qərb yarımkürələrinə bölünərək təsvir olunur. Yarımkürələrin fiziki xəritəsi 1:220 000 000 miqyasda tərtib olunur. Bu xəritənin əsasında coğrafiyanın öyrənilməsi üçün aşağıdakı bilikləri almaq olar.

Yarımkürələrin fiziki xəritəsinə nəzər salarkən görünür ki, dünyanın çox hissəsini okean suları təşkil edir və ona Dünya okeanı deyilir.

Dünya okeanı Yer kürəsinin 361 mln. km² sahəsini əhatə edir ki, bu da onun ümumi sahəsinin 79%-nə bərabərdir. Yerin qalan 21%-i qurudan ibarətdir və sahəsi 149 mln. km² - dir. Quru sahələrinə Avrasiya, Afrika, Şimali Amerika, Cənubi Amerika, Antarktida və Avstraliya materikləri aiddir.

Materiklərlə yanaşı qitələr də qurunun bölgüləri kimi istifadə edilir. Lakin onların adları tarixən yaranmışdır, ona görə tarixi-coğrafi bölgü hesab olunur. Qərb yarımkürəsində Şimali Amerika və Cənubi Amerika materikləri Amerika qitəsi olaraq təsvir edilir. Avrasiya materiki isə Avropa və Asiya qitələrinə ayrılır. Ümumilikdə 6 materik və 6 qitə vardır.