Biz çörəyi həmişə üstün tutmuşuq. Adətən, evimizdə süfrə açarkən əvvəlcə çörəklə duzu süfrəyə qoyuruq. Un və sudan hazırlanan çörək həmişə müqəddəs sayılıb. O, insanın gündəlik tələbatı olan ərzaq məhsuludur.
Mən bu gün sizə Hindistanın milli çörəkləri haqqında məlumat vermək istəyirəm.
Burada, əsasən, buğda, arpa, darı, düyü unundan çörəklər: “çapati”, “puri”, “roti”, “dosa” adlanan çörəklər hazırlanır.
Müxtəlif forma və dadları olan, kətəyə və kiçik lavaşa bənzər çörəklər çox tez hazırlanır. “Paratha” və “çapati” ən çox istifadə оlunаn çörək növləridir. “Çapati” çox nazik mayasız çörək olub acı “kari” sousu ilə yeyilir. Bu çörək növü sini və ya tavada bişirilir.
“Çapati” bol yağda qızardıldıqda “puri” çörək növü alınır. “Roti” adlanan çörək isə tavada bişirilir. “Paratha” yağda qızardılan, içi ədviyyatla doldurulan nazik çörək, “Pappadum” yaşıl mərci unundan bişirilən yuxaya bənzər çörəkdir.
“Naan” çörəyi isə, əsasən, Şimali Hindistandа “tandoor”larda bişirilir. “Tandoor” içi kömürlə dolu, divarları palçıqla suvanmış sadə təndirdir.
Azərbaycanda olduğu kimi, Hindistanda da təndirlərdə çörəkdən əlavə, toyuq və quzu parçaları bişirirlər.
Göründüyü kimi, bütün xalqlarda olduğu kimi Hindistanın süfrəsində də müxtəlif çörək növlərindən istifadə olunur.
MƏSLƏHƏT: Çörək barlananda (kiflənəndə) nə etməli?
Çörəyi dərhal atmağa tələsməyin. Onu yenidən dadlı və ləzzətli etmək olar. Qazanı sobanın üzərinə qoyub müəyyən qədər su tökün və içinə xüsusi dəmir şəbəkə yerləşdirin. Barlanmış çörək dilimlərini onun üzərinə düzün. Çalışın ki, çörəyə su dəyməsin. Qazanın ağzını qapaqla bağlayıb 5–7 dəqiqə qaynadın. Sonra çörəyi qazandan çıxarın. Çörək əvvəlki kimi təravətli və ləzzətli olur. Amma həmin çörəkləri tez yemək lazımdır, çünki təzələnmiş çörək 2-3 saatdan sonra barlanmağa başlayır. Müzakirə:
✓ Çörəyin kiflənməməsi üçün nə etmək lazımdır? |