Əgər düyü çox həlimlidirsə, üzərinə qaynar su gəzdirilir.
Dördüncü mərhələ düyünün dəmə qoyulmasıdır. Bunun üçün qazana yağ tökülüb qızdırılır və dibinə qazmaq salınır (şəkil 3).
Qazmağın üzəri yağlanır, süzülmüş düyü tökülür (şəkil 4). Düyüyə dəmlənmiş zəfəran və ərinmiş kərə yağı gəzdirilir. Qazanın ağzı üzərinə dəsmal çəkilmiş qapaqla kip bağlanır, vam odda 40-50 dəqiqə dəmə qoyulur (şəkil 5). Düyü qazana təpə halında yığılır. Qazanın divarları ilə düyü arasında məsafə qoyulur ki, içəridə alınan buxar düyüyə hər tərəfdən eyni bərabərdə təsir etsin və dəm alsın. Plov dəm aldıqdan sonra bir neçə dəqiqəlik yer dəminə qoyulur.
Düyü hazır olduqdan sonra onu necə emal etmək olar? Qazmağın hazırlanma texnologiyası nədən ibarətdir? |
Qazmaq nəinki düyünü yanmaqdan qoruyur, eləcə də yağda qızarmış xırtıldayan nazik və ləzzətli təbəqəyə çevrilir. Südlü, şirin və toyuq plovların qazmağı süfrəyə verildikdə üzərinə darçın da səpilir. Plovun növündən asılı olaraq, xəmirin hazırlanmasında istifadə olunan ərzaqların tərkibi dəyişir. Ətli və balıqlı plov üçün: 350 q un, 1 ədəd yumurta, 20 q su, 25 q kərə yağı və duz götürülür. Südlü və şirin plovlar üçün: 350 q un, 1 ədəd yumurta, 20 q su, 25 q kərə yağı, 5 q şəkər, 5 q darçın götürülür.
Əlavələrin növündən və xarakterindən asılı olaraq plovlara müxtəlif adlar verilir. Onlardan bir neçəsinin hazırlanma texnologiyası ilə tanış olaq:
1. Qovurmaplovun hazırlanma texnologiyası:
Resurslar: adambaşına - 200 q qoyun əti, 150 q düyü, 50 q ərinmiş yağ, 3 ədəd baş soğan, 30 və 15 q alça və ya gavalı qurusu, 20 q şabalıd, 0,1 q zəfəran, 0,4 q darçın, istiot, duz.
Yumşaq qoyun ətindən 35-40 qramlıq tikələr kəsilir, duz və istiot vurulub öz suyunda pörtlədilir. Sonra ona yağda qızardılmış baş soğan, yuyulmuş alça qurusu əlavə edilir və ət bişirilərək hazır hala gətirilir (şəkil 6).
Düyü adi qaydada süzülür və dəmlənir. Boşqaba təpə şəklində çəkilir. Süfrəyə qovrulmuş ət ilə verilir, digər tərəfinə isə qazmaq hissələri qoyulur (şəkil 7).