3. İçlik hazırlanır (şəkil 2). Adətən, dolma üçün içlik qoyun ətindən hazırlanır, lakin zövqə uyğun qoyun ətinə dana əti də əlavə edilə bilər. Əgər dolma dana ətindən bişirilirsə, ona bir qədər qoyun quyruğu qatılır. Bütün tərkib hissələri əlavə edildikdən sonra dolma içliyi əl ilə yaxşıca qarışdırılır.
4. Dolmanın bükülmə ardıcıllığı şəkil 3-də göstərilmişdir.
• Üzüm yarpaqları hamar üzü aşağı olmaqla masa üzərinə düzülür.
Hər yarpağın ortasına orta hesabla 25 q içlik qoyulur (şəkil 3, a).
• Əvvəlcə yarpağın yuxarı kənarı içliyin üzərinə qatlanır (şəkil 3, b).
• Sonra yarpağın hər iki yandan digər tərəfləri qatlanır (şəkil 3, c).
• Sonda dolma boğça və yaxud borucuq şəklində bükülür (şəkil 3, ç).
Bu ardıcıllıqla qalan dolmalar hazırlanır.
5. Qalın altlıqlı qazanın dibinə 1-2 qat üzüm yarpağı düzülür. Bu məqsəd üçün yararsız və cırılmış yarpaqlardan istifadə edilə bilər (şəkil 4).
Şəkil 3. Dolmanın bükülmə texnologiyası
6. Dolma qazana sıra-sıra yığılır. Bu zaman hər bir dolma qat yeri aşağı olmaqla kip yerləşdirilir (şəkil 5). Qazana su tökülür. Suyun hündürlüyü dolmanın üst qatından 1,5-2 sm aşağı olmalıdır. Dolmaların üstünə nimçə çevrilir (şəkil 6).
Qaynama zamanı dolmaların çevrilməməsi üçün nimçənin üzərinə ağırlıq (çay daşı) da qoyula bilər.
7. Dolma olan qazan od üzərinə qoyulur, qaynama həddinə çatdırıldıqdan sonra alov minimum həddə qədər azaldılır. Vam odda 1-1,5 saat bişirilir. Hazır dolma oddan götürülür və özünü tutması üçün 10 dəqiqə saxlanılır. Bu vaxt ərzində dolma suyunu canına çəkir və daha şirəli və dadlı olur.