Göründüyü kimi, adi qrafın (yönəldilməmiş qrafın) qonşuluq matrisi həmişə baş diaqonala nəzərən simmetrikdir. Matrisin baş diaqonalı sol yuxarı küncdən sağ aşağı küncə gedir.
Qrafı "tillər siyahısı" şəklində də saxlamaq olar. Bu halda hər bir til iki ədədlə – onun başlanğıc və son təpəsinin nömrəsi ilə göstərilir. Qrafın təpələrinin sayı ayrıca dəyişəndə saxlanılır, çünki yalqız (heç bir təpə ilə birləşməmiş) təpələr tillər siyahısına "düşmür".
num_vertices = 6 # Təpələrin sayı
edges_list = [[0, 1], # Tillərin siyahısı
[0, 2],
[0, 4],
[1, 2],
[1, 3],
[1, 4],
]
Qraflarla bağlı daha bir neçə anlayışla tanış olaq. Sonuncudan başqa hər bir tilin son təpəsi o biri tilin başlanğıc təpəsi olarsa, belə tillər ardıcıllığına yol deyilir. Qapalı yola isə dövrә deyilir. Məsələn, yuxarıdakı nümunədə 1, 2, 3 təpələrini birləşdirən tillər yol əmələ gətirir, 1, 2, 5 təpələri arasındakı yol isə dövrədir.
Qeyd olunduğu kimi, qrafın bütün təpələrinin birləşməsi vacib deyil, ancaq qrafın istənilən iki təpəsi arasında yol varsa, onda belə qraf әlaqәli adlanır.
Bəzən hər hansı təpədən çıxan til həmin təpəyə qayıdır. Belə tilə ilgәk deyilir.
Əgər tilin müəyyən istiqaməti varsa (məsələn, til B təpəsindən A təpəsinə deyil, A təpəsindən B təpəsinə gedirsə), belə tilə qövs deyilir. Başqa sözlə, til, sadəcə, qrafın iki təpəsini birləşdirir, qövs isə bir təpədən başlayır, o biri təpədə bitir. Bütün tilləri qövs olan qrafa yönәldilmiş qraf və ya diqraf deyilir.
Yönəldilmiş qrafları yaddaşda saxlamaq üçün müəyyən dəyişikliklərlə bu üsullardan istifadə etmək olar: