Linzada sınan ixtiyari şüanın yolunu bilməklə istənilən cismin xəyalını qurmaq mümkündür. Bu məqsədlə cismin kənar nöqtələrinin xəyalı qurulur. Kənar nöqtələrdən çıxan şüalar elə seçilir ki, onların linzada sındıqdan sonrakı yollarını qurmaq asan olsun. Bu baxımdan cismin B kənar nöqtəsinin xəyalını qurmaq üçün aşağıdakı şüaların seçilməsi əlverişlidir (b):
1. Linzanın baş optik oxuna paralel olan 1 şüası. Toplayıcı linzada sınan şüa linzanın fokusundan keçir (1' şüası).
2. Linzanın fokusundan keçən 2 şüası. Bu şüa toplayıcı linzada sındıqdan sonra baş optik oxa paralel istiqamətdə yayılır (2' şüası).
3. Linzanın optik mərkəzindən keşən 3 şüası. Optik mərkəzdən keçən bu şüa sınmaya məruz qalmadan yayılır (3' şüası). Beləliklə, cismin B nöqtəsinin xəyalı 1', 2' və 3' şüalarının kəsişdiyi B' nöqtəsində alınır.
Toplayıcı nazik linzada xəyalın qurulması. Cisim məsafəsi ilə toplayıcı linzanın fokus məsafəsi arasında münasibətin d ≥ F olduğu bütün hallarda toplayıcı linza cismin həqiqi xəyalını verir, çünki xəyal sınan şüaların kəsişməsindən alınır. Həqiqi xəyal həmişə tərsinə çevrilmiş olur. Cisim məsafəsi linzanın fokus məsafəsindən kiçik olduğu (d < F) halda isə toplayıcı linzada cismin mövhumi xəyalı alınır. Xəyal sınan şüaların özlərinin deyil, uzantılarının kəsişməsindən alınır. Mövhumi xəyal həmişə düzünə olur.
Toplayıcı linza cismin beş halda həqiqi, bir halda mövhumi xəyalını verir:
1. Cisim linzadan sonsuz uzaq məsafədə olduqda: d → ∞. Həqiqi xəyal linzanın fokusunda nöqtə şəklində alınır (linzada sınan şüalar onun fokusunda toplanır): f = F.
2. Cisim linzanın ikiqat fokusundan uzaqda olduqda: d > 2F. Cismin xəyalı həqiqi, kiçildilmiş və tərsinə çevrilmiş alınır. Xəyal linzanın fokusu ilə ikiqat fokusu arasında yerləşir: 2F > f > F.
3. Cisim linzanın ikiqat fokusunda olduqda: d = 2F. Onun xəyalı linzanın ikiqat fokusunda yerləşməklə (f = 2F) həqiqi, özü boyda və tərsinə çevrilmiş alınır.