Üçrənglİ bayraq

Bu üçrəngli bayrağım
Gözümün işığıdır.
Azadlıq yağışından
Doğan göy qurşağıdır.
Üstündəki ay-ulduz
Gəlir mənim xoşuma.
Ay üzüyə bənzəyir,
Ulduz onun qaşına.
Üçrəngli bayraq bizə
Təsəllidir, dayaqdır,
Yolumuzun üstünə
İşıq saçan mayakdır.

Rafiq Yusifoğlu

 
Sözlük
Mayak – gəmilərə yol göstərmək üçün siqnal işığı olan hündür qüllə
Söz ehtiyatı

  1. “Qaş” sözünü aşağıdakı mənalarda cümlələrdə işlət.

    1. İnsanın gözləri üstündə qövsşəkilli xətt
    2. Müxtəlif bəzək əşyalarına taxılan qiymətli daş
Şifahi nitq

  1. Cümlələri izah et.

    1. Bayraq mənim gözümün işığıdır.
    2. Bu bayraq azadlıq yağışından yaranıb.
    3. Bayraq yolumuza mayak kimi işıq saçır.

  2. Azərbaycan bayrağındakı rəng və nişanların mənalarını araşdır.