Sənaye xəritələrinin digər xəritələrlə (nəqliyyat, əhali sıxlığı və s.) müqayisəli təhlili təsərrüfatın yerləşməsində digər coğrafi qanunauyğunluqların da müəyyən edilməsinə imkan verir. Məsələn, xəritədə sənaye mərkəzlərinin yaxın yerləşməsi bu ərazidə şəhərlərin sayının çox və əhali sıxlığının yüksək, nəqliyyat şəbəkəsinin sıx olmasını ifadə edir.

Ölkələr müxtəlif göstəricilərinə görə (əhalinin sayına, adambaşına düşən milli gəlirə, elektrik enerjisi istehsalına və s.) bir-birindən fərqlənir. Ölkə daxilində daha “güclü mərkəz”lərlə yanaşı, “zəif əyalətlər” də mövcuddur. Kartoqrafik təsvirlər üzərində bu fərqləri əks etdirmək üçün son illərdə anamorfoz xəritələrdən istifadə olunur. Anamorfoz xəritələr ənənəvi xəritələrdən tamamilə fərqlənir. Bu xəritələr riyazi statistika əsasında tərtib edilir. Məsələn, dünya əhalisinin sayını göstərən anamorfoz xəritədə Çin, Hindistan və əhalisinin sayı daha çox olan digər ölkələrin ərazisi təhrif olunmuş halda, yəni daha qabarıq təsvir edilir.

Əhalisi azsaylı olan ölkələrin (məsələn: Kanada, Avstraliya və s.) ərazisi böyük olsa da, anamorfoz xəritələrdə daha kiçik ölçüdə göstərilir.

Azərbaycanın sənaye və kənd təsərrüfatı xəritələrini müqayisə edin. Təsərrüfatın yerləşməsindəki qanunauyğunluqları təsdiqləyən nümunələr göstərin. Nəticələri cədvəl formasında təqdim edin.